tikhonkulbaka: (Default)
[personal profile] tikhonkulbaka

0_6e0a7_70174696_-2-XLЛОРя
Из требника митрополита Петра Могилы 1646 год

Глас 8.

Песнь 1. Ирмос:

Поим Господеви, Израиля древле от работы видимаго Фараона преславно избавившому, и Моисеовым жезлом, яко по суху сквозе Чермное море пречудно проведшому, нас же от лести мысленнаго фараона на конец веков Своею Честною Крови спасшому, яко прославися.

Припев: Сердце чисто созижди во мне, Боже, и дух прав обнови во утробе моей.

Верою несумненною, с страхом обаче, надеяся на словеса Твоя сия: грядущаго ко Мне не изжену вон, дерзаю приближатися и служити святому Ти Жертовнику, но аще и недостоин есьм, Ты мя Сам, яко благоутробен, Святым Твоим достойно служити яви Тайнам.



Припев: Не отвержи мене от Лица Твоего, и Духа Твоего Святаго не отыми от мене.

Никтоже достоин нарещися может пред Твоим величеством (вся бо правда наша яко рубище повержено, есть пред Тобою,) аще не Твоя благодать туне оправдит нас. Сам убо, Человеколюбче, по благоутробию Твоему, сотвори мя достойна служити Святым Твоим Тайнам.

Слава: Священник Сый во веки, по чину Мелхиседекову, Христе Спасе мой, Себе жертву жиу единою Отцу Своему, на Крестном Жертовнице, о нас принесл еси, иже и нами всегда приношен безкровне хотя бытии во спасение верным, уставил еси нас служити Святому Твоему Жертвонику, темже и ныне достойно сподоби мя служити Святым Твоим Тайнам.

И ныне: Дево Пречистая, Мария Богородице, Бога Слова неизреченно плотию от Духа Святаго заченшая, и без истления  девства, во спасение верным рождшая, Того яко благосердая, прилежно Матерски моли, да достойно мя Твоих ради всеприятных молитв сподоби, Святым своим служити Тайнам.

Песнь 3. Ирмос:

Да утвердится сердце мое о Тебе Христе Спасе, да вознесется рог Твой о Бозе Спасе моем, и да отверзутся уста моя, на пение Твоея хвалы: возвеселих бо ся о спасении Твоем, яко разумов Господь Ты еси, и Бог, уготоваяй начинания Своя, и несть Свята паче Тебе, Господи.

Припев: Сердце чисто созижди во мне, Боже, и дух прав обнови во утробе моей.

Не на достоинство мое, егоже не имам, но на пучину Твоего благоутробия взирая, дерзаю приближитися ко Святому Ти Жертовнику, ислужити Святым Твоим Тайнам. Ты убо, Спасе, яко благоутробен, сотвори мя достойно Безкровную Тебе принести  Жертву.

Припев: Не отвержи мене от Лица Твоего, и Духа Твоего Святаго не отыми от мене.

Аще всяк живый не оправдится пред Тобою, Владыко Человеколюбче: яко аз недостойный, идеже ангели приникнути желают, внити и служити страшному Ти Жертовнику дерзну; но Ты мя сподоби достойно Безкровную Ти и Всесвятую принести Жертву.

Слава: Не по моему достоинству, но по Твоему благоутробию, якоже сподобил мя еси в чину священных Твоих слуг вчислятися: сице и Святому Ти предстати Жертовнику сподоби. О моих же согрешениих и о л+юдских нев+еждествиих, словесную и безкровную принести Ти Жертву.

И ныне: В утробе Своей безсеменно Пресущественного заченшая, и несказанно носившая Творца твари, Богородице Пресвятая, и плотию неизреченно родившая, Того моли, да еже неосужденно ми священнодествовати Священная Его Таинства, и достойно принести Ему Безкровную Жертву.

Седален, глас 2:

Да чистою совестию и верою несумненною, Святому Твоему представ Жертовнику, соединюся неосужденно Святым Твоим Тайнам – ими же обожает и оживляется всяк ядый и пияй верно, и от грех очищается, пребогатую данную премудрым Твоим Апостолам благодать, даруй ми, Христе Боже, и помилуй мя.

Слава, и ныне:

Пренепорочная Дево Чистая, со всеми Святыми, молися Сыну и Богу Тоему, даровати моим согрешением прощение, и причастника мя достойна Божественным Своим явити Тайнам. Да Того яко Бога славлю во веки, Тебе же яко Божию Матерь безпрестанно величаем.

Песнь 4. Ирмос:

Услышав Пророк приход Твой, Христе, убояся: аз же верою пречудная Твоя уразумев дела, трепетно удивляюся. От юга бо на спасение верным пришел еси, в гневе помянути милость, и сего ради Тебе, с Аввакумом, Боже, радуяся вопию: учении нозе мои на совершение, да прославлю Твое Божество и воспою: силе Твоей слава Человеколюбче.

Припев: Сердце чисто созижди во мне, Боже, и дух прав обнови во утробе моей.

Ни в хлебе, ни с хлебом, ни под хлебом Тело; ни в вине, ни с вином, ни под вином Кровь быти, но существо хлеба в Самое Твое Тело, Спасе, и существо вина в Самую Пречистую истинную Твою Кровь пременятися верую. Под обоих же виды Единаго Тя цела Богочеловека исповедую, Ему же и молюся, достойно мя служити и причаститися сподоби.

Припев: Не отвержи мене от Лица Твоего, и Духа Твоего Святаго не отыми от мене.

Ни образ тела, ниже образ крове, но Самое Истинное одушевленное и обоженное Тело, и Божественную из ребр истекшую Ти, Спасе мой, Кровь, в Пречистых Твоих Евхаристии Тайнах быти верую и твердо исповедую: им же молюся, достойно мя служити и причаститися, Христе мой, яко Бог, милости и благоутробия сподоби.

Слава: Не Телу с небес сходити, но хлеба существу, в Оное, на небеси сущее, и вина в Пребожественную Твою, Христе мой, Пречистую Кровь, Божественными Ти словесы, действом же Пресвятаго Духа, выше слова и разума, пременятися исповедую. Ты бо обычными естества яже суть выше естества твориши, им же мя ныне служити и достойно причаститися, Спасе мой, сподоби.

И ныне: Тогожде Единаго, нераздельне целаго в Тайнах на престоле, под видимыми виды невидимо покровеннаго Христа Бога, из Тебе, Дево Богородительнице, воплощеннаго, иже и на небеси одесную Отца, с Ним и с Духом Пресвятым славимый, божественно сидит, твердо бытии верую и исповедую. Ему же мя Ты, яко щедрот и милосердия Мати, теплыми Ти молитвами, служити и достойно причаститися сподоби.

Песнь 5. Ирмос:

От нощи Духом к свету Твоих живодательных повелений, утренюю Боже, и молюся тепле, росою яже от Тебе исцели недугующую грехами душу мою и страх Твой божественный всади в сердце мое, да приму Дух спасения Твоего, его же дал еси на земли. Кроме бо Тебе инаго Бога не знаю, и Имя Твое Святое именую.

Припев: Сердце чисто созижди во мне, Боже, и дух прав обнови во утробе моей.

Яко Самого Бога всесильна, на небеси и на земли, и всюду Тя, Христе, суща исповедую, яко же Бога и человека на небеси точию одесную Отца, и на земли в Тайнах Причащения бытии верую. Ими же мя недостойнаго, достойно, яко Благ, служити сотвори и причаститися, яко Человеколюбец, неосужденно сподоби, великия ради Твоея милости.

Припев: Не отвержи мене от Лица Твоего, и Духа Твоего Святаго не отыми от мене.

Верою твердо увещаваюся, под видимыми Хлеба и Вина виды, истинное быти Тело, и истинную и спасительную Ти, Христе Спасе мой, Кровь, яко же апостолом Своим подавая рекл еси, яже мя в жертву благоприятную Отцу Твоему, о моих согрешениих, и о людских невеждествиих, неосужденно принести сподоби, великия ради Твоея милости.

Слава: Пресуществения Божественных Ти Таин, Образа не свем, Господи, ниже еже како пременение Сих бывает испытую. Образ бо есть неисповед+имый, но яко Словесы Твоими и наитием Святаго Духа, от таинственнаго Твоего еже в Деве воплощения навык, твердо уверяюся, яко Ты еси в Тайнах Причащения, вещественне Христос Бог и человек, пришедый в мир спасти нас, великия ради Твоея милости.

И ныне: Плоть юже от Девы приял, и на смерть вдал еси, на Небеса же вознес, одесную Отца сопосадил еси, туюжде едину и под видом Хлеба на престоле, яко же и от Пречистых Ти ран истекшую Кровь, под видом Вина в Божественной Чаши, по изречении Божественных Ти Словес, действием Пресвятаго Духа бытии верую, яже достойно священнодествовати, и тем неосужденно причаститися  сподоби мя, Христе, великия ради Твоея милости.

Песнь 6. Ирмос:

Из чрева ада греховнаго, от глубины сердца, пучиною житейскою погружаем, яко от кита Иона, вопию Ти, милосерде Христе Боже, от тля страстий, и от рова преисподняго зол моих, живот мой возведи. Иисусе, Царю силам, да приложь, еже достойно, со гласом хваления и исповедания, во Твоей Церкви, Безкровную Жертву пожрети Тебе.

Припев: Сердце чисто созижди во мне, Боже, и дух прав обнови во утробе моей.

Аще и пресуществуется Хлеб и Вино, но существа своего не оничтожевают, ниже иное приемлют, но свое существо в Тело Христово, и Честную Его Кровь, неизреченно пременяют, и уже к тому не хлеб ниже вино есть, но в обоих Един Христос целый,  точию виды Хлеба и Вина, яже непременны пребывают, Покровенный в снедь и спасение верным  предлежит.

Припев: Не отвержи мене от Лица Твоего, и Духа Твоего Святаго не отыми от мене.

Аще и всегда раздрабляется, и верным раздавается, но цел и един Христос в Тайнах, по всей вселенней на престолех неразделим пребывает, и всегда ядом, никогда же снедаем, ниже истощаваем бывает, но освящает и просвещает, верою и чистым сердцем причащающихся, и благодать Свою Божественную подает, неизреченно тем совокупляяся, на снедь бо и спасение верным предлежит.

Слава: Яко же человека Себе совокупляя Спасе, телом Божество Свое покрыл  еси, сице и ныне, да нас плоть от плотий, и кость от костей Твоих сотвориши, в Тайнах истинную Плоть и Кровь Твою во спасительную снедь и питие верным предлагаеши, видимыми Хлеба и Вина виды покрыв, ими же и мене достойно причаститися сподоби.

И ныне: Богородице, Мати Живота, Хлеб жизни вечныя, Тело спасительное Христа Бога моего, и Чашу Безсмертия Кровь Его божественную, Твоими Матерными прилежными мольбами, достойно мя (во оставление грехов, во исполнение премудрости,  во преспеяние в добродетелех, и во приобретение жизни вечныя) прияти ныне, яко Человеколюбивая, сподоби, на се бо в пищу верным предлежит.

Кондак, глас 8:

Превечная Божия Премудрость, от Девственныя утробы плотский Себе создавши храм, Себе волею всегда закалает, в снедь верным предлагающи, и в Чаши Божественную Свою черплет Пречистую Кровь, вопиющи: Ядите, Сия бо есть Моя Плоть, Ангельское воистину брашно, и Пийте от Нея вернии вси, сия бо Моя истинная грехочистителная есть Кровь, из Божественных Моих ребр истекшая, Небесное воистину питие, им же мы причащающееся, в вере утверждаемся.

Икос

Храм Себе, Отцу же и Пречистому Духови сотворити в верных Своих хотя Христе Боже, не точию до плоти, и даже до Креста и смерти смирился еси, но и Плоть Свою обожженную, и одушевленную, и Кровь животворящую, во спасительную снедь и питие верным дал еси, и ныне священнослужителми Твоими всегда подаваеши. Тем же и аз недостойный премногому Твоему, еже к нам удивлься милосердию, молебно Тебе вопию:

               Иисусе, Боже воплощенный, недостойного мя, достойно Святому Ти Жертовнику  служити сотвори.

               Иисусе, от Троицы Едине, непреложно вочеловечивыйся, изволи мя неосужденно священнодействовати Божественная Твоя таинства.

               Иисусе, Боже пребогатый, даже до последнея смиривыйся нищеты, очисти мя от совести лукавыя.

Иисусе Боже, плотию изволивый нас д+еля продан, связан, биен, и к Анне и Каиафе веден  бытии, чистое мя пребыванию Твоему сотвори вселение.

            Иисусе Боже, безстрастное Слово, раны, заушения, оплевания и поносныя уничижения от иудеов волею претерпевый, благоизволи ми неосужденно Святым Твоим Причаститися Тайнам.

            Иисусе, Царю веков, тернием венчанный и в хламиду наругания облеченный, сотвори мя Себе, Отцу же и Своему Духови, Таин Твоих причащением, достойное бытии пребывание.

            Иисусе, Судие праведный, неправедно от Пилата осужденный, и оцтом с желчию напоенный, даждь ми не в суд, но в спасение Тело Твое ясти и питии Божественную Твою Кровь.

            Иисусе, Боже безсмертный, гвоздями на Кресте пригвожденный и умерщвленный, умерщвленную грехами душу мою, животворящим Твоего Тела и Крове причащением оживи.

            Иисусе Животдавче, плотию на Кресте умерый и копием прободенный, туюжде едину Божественную Твою Плоть  и Кровь из ребр истекшую, во оставление грехов и в жизнь вечную  сподоби мя прияти.

            Иисусе, с Отцем и Духом Единосущный, с Креста же плотию снятый, и во гробе яко мертв положенный, мене, страстьми плотскими миру пригвожденнаго и на кресте высокоумия вознесеннаго, с того снем и во гробе смиренномудрия положив, каменем, еже в Тя твердыя веры привали, Честнаго Ти ради Тела и Святыя Крове причащением, его же мя, молюся, сподоби.

            Иисусе, Боже всесильне, во ад сошедый и души праведных от истления свободивый, и мене в аде нечувствия и разленения погруженнаго, причащением Пречистых Ти Таин, к разуму трезвения, на высоту боговидения возведи.

            Иисусе, Боже, животом и смертию владычествуяй,  самовластно же из мертвых воскресый, на Небеса вознесыйся, и одесную Бога Отца плотию седый, и Божеством везде Сый, грехом умершаго, Животворящего Ти ради Тела и Крове причащения оживи, и свету Твоему причастника мя сотвори, да верою утверждаюся.

Песнь 7. Ирмос:

Триех отрок несумненная вера, мучителя гордаго безбожное веление, благочестно поправши, в пещи огнь на хлад преложи, и неврежденно в нем ликовствующих,  аки в свете единеми усты согласно преславная деющему чудеса пети ,и того благословити чудно научи, отец наших Боже, благословен еси.

Припев: Сердце чисто созижди во мне, Боже, и дух прав обнови во утробе моей.

Брашно есмь верных, Христе в Тайнах вопиеши, веруяй и снеси мя, небо аз в тя, яко тленная твоего тела, преложуся пища, но Ты в мя претворишися и обожиши мя причащением. Тем же и аз усердно молю Тя, Тела Твоего Пресвятаго и Крове Божественныя, сподоби мя руками достойно коснутися и в спасение усты приятии и Тебе славити, отцем Бога во веки.

Припев: Не отвержи мене от Лица Твоего, и Духа Твоего Святаго не отыми от мене.

Нераздельнаго ради соединения, Бога и человека, яко же и на небеси, сице и в Божественных Тайнах, истинно верую Тя быти, Христе мой, просвещающаго, освещающаго же и Себе совокупляющаго, верою и чистым сердцем тем причащающихся, им же и мене в приобретение вечныя жизни, сподоби причаститися, и Тебе славити отцем Бога во веки.

Слава: Хлеб живота вечнаго Тело Твое, под видимым видом хлеба вещественнаго, и Чашу Безсмертия Кровь Твою спасительную, под видом вина естественнаго, яко милостив Христе Спасе, во оставление моих прегрешений, сподоби мя достойно приятии и славити Тя, отцем Бога во веки.

И ныне: Хлеб, его же в Божественных ямы Тайнах, Хлеб есть рукою Духа Святаго во чреве Девыя воображенный, и огнем Страстий на Олтаре Крестнем испеченный. Хлеб ангельский в снедь верным дается, его же мя Христе достойно сподоби ясти, и чашу Твою спасителную испити, Тебе же славити отцем Бога во веки.

Песнь 8. Ирмос:

В пещь огненную иногда к детем еврейским сошедшаго Слова и пламень на хлад пречудно преложшаго Господа, в последняя же лета в чрево Девыя вселшагося Бога и нас от работы вражия Плотию Своею преславно свободивша, яко Творца и Зиждиделя пойте вся дела, и превозносите во вся веки.

Припев: Сердце чисто созижди во мне, Боже, и дух прав обнови во утробе моей.

Под видом пшеничнаго в квасе хлеба, Самое Тело Твое, яко же рекл еси Христе,  под видом же вина от плода лознаго, Самую пречистую Ти Кровь, под обоих же нераздельными виды, единаго Тя Богочеловека цела, верным во спасение бытии верую, и верно вопию, Господа воспевайте людие, и превозносите во вся веки.

Припев: Не отвержи мене от Лица Твоего, и Духа Твоего Святаго не отыми от мене.

Хлеб приим Христос естественный Пречистыма Своима рукама, и от плода лознаго вино, словесы же Своими Божественными преестественно в Тело и Кровь Свою та претворив, учеником подаде вопия: Ядите и пийте во оставление прегрешений. Еже и ныне на престоле творит всегда священнослужителми Своими, Его же благословят людие, и превозносят во вся веки.

Слава: Слово Божие понеже истинное, действителное же есть и всемощное, образ же непостижимый: без испытания верую, яко хлеб и вино, водою растворенное, пременяет в Тело и Кровь Свою Христос Бог Духом Пресвятым, Им же и от Святыя Богородицы, Сам Собою и в Самом Себе плоть состави, Его же благословят людие, и превозносят во вся веки.

И ныне: Родила еси Пречистая Дева не человека проста, но Бога истиннаго, ниже Бога нага, но воплощена от Твоих пречистых кровий. Того убо яко Сына и Бога моли, да мя ныне достойно в оставление грехов и в жизнь вечную, сподобит Тело Свое Святое ясти и Кровь Божественную пити, Его же благословят людие, и превозносят во вся веки.

Песнь 9. Ирмос:

Еву от ребра Адама первозданного создавый и того без вреда цела сохранивый, в последняя лета Духом Святым от Тебе, Дево Всечистая, плоть Себе заимствова и ключа девства в Рождестве яко же прежде Рождества невредив, неизреченно паче ума родися. Его же яко Бога и Зиждителя величающе Тебе, Богородице, непрестанными гласы превозносим и благочестно ублажаем.

Припев: Сердце чисто созижди во мне, Боже, и дух прав обнови во утробе моей.

Яко же по естеству через ядение хлеб, через питие вино и вода в плоть и кровь ядущаго и пиющаго прелагается и не бывает иная, точию таяжде первая его плоть, сице и на престоле хлеб и вино, водою растворенное, призыванием и нашествием Святаго Духа выше естества в Тело и Кровь Христову прелагается, и не два, но един и тойжде  есть Христос Бог во веки благословенный и препрославленный.

Припев: Не отвержи мене от Лица Твоего, и Духа Твоего Святаго не отыми от мене.

Сице верую и сице несумненно, якоже предрекох, о Тайнах Божественного Ти Причащения, о Христе мой, исповедую, ими же мя достойно в истребление многих ми согрешений, в очищение и освящение, в стену и помощь, в возражение сопротивных и в обручение будущаго живота и Царствия сподоби причаститися. Во веки бо еси Бог благословенный и препрославленный.

Слава: Причастие Пречистаго Ти Тела, Господи, да будет ми угль, страстная души попаляя движения и очищая сердце мое. Общение же Честныя Ти Крове, веселия духовнаго да исполнит сердце мое и ум Твоим радованием, и Твоему Отцу с Тобою и Духом Святым да сотворит во мне достойное пребывание. Во веки бо благословен Бог еси и препрославленный.

И ныне: Пренепорочная Дево, Мати Царя вышних сил, прибежище и покрове, стено помощь и заступление, к Тебе верно притекающим молюся усердно недостойный раб Твой, сосуд мя избранен, Твоими Матерними молитвами, причастию Пречистых и Божественных Таин Твоего Сына и Бога ныне покажи, Той бо во веки есть благословенный и препрославленный.



опечатка

Date: 2012-11-23 04:29 pm (UTC)
From: [identity profile] ierei.livejournal.com
Возможно в этом тропаре опечатка в выделенном слове, наверное должно быть оцтом т.е. по смыслу уксусом

Иисусе, Судие праведный, неправедно от Пилата осужденный, и отцом с желчию напоенный, даждь ми не в суд, но в спасение Тело Твое ясти и питии Божественную Твою Кровь.

Re: опечатка

Date: 2012-11-23 05:40 pm (UTC)
From: [identity profile] arkhimtikhon.livejournal.com
о, да, верно - Вёрд все исправлаяет по-своему))

Date: 2012-11-24 09:29 am (UTC)
From: [identity profile] pere-grin.livejournal.com
Спаси, Господи, за предоставленный канонъ!

Profile

tikhonkulbaka: (Default)
tikhonkulbaka

December 2013

S M T W T F S
1234567
891011121314
15161718192021
22232425262728
293031    

Style Credit

Expand Cut Tags

No cut tags
Page generated Oct. 24th, 2017 11:02 am
Powered by Dreamwidth Studios